 |
الأستاذ/ أحمد محمد زايد
|
نقال الكلام السوسه
بين فاطمه وبين نفوسه
راح يعمل وقايع تانيه
نقال الكلام
نقال الكلام لمو أخذه
بقى زى الشيطان في الوزه
بيوز اسرائيل على غزه
ويوز الخيار ع الكوسه
نقال الكلام
والكلمه إذا طلعها
يرميها في غير مطرحها
والنخله تقع ببلحها
تتدمر بنخر السوسه
نقال الكلام
الكلمه اللى ح يقولهالك
عن عمك وابوك أو خالك
فى ثانيه تشقلب حالك
وتخلى عينيك ملبوسه
نقال الكلام
تتلفت شمال وتدور
تتنرفذ وراح تتهور
تتبدل بجن مصور
وتشوف الأمور معكوسه
نقال الكلام
تسمعلو ح يخرب بيتك
ويهد الزراعه في غيطك
وانا منه كتير وعيتك
من خوفى على المحروسه
نقال الكلام
ليست هناك تعليقات:
إرسال تعليق