 |
| الشاعر والكاتب الراحل د. عبدالغني مصطفي ابن كفرالزيات |
اسمعني يا عمي
أنا مواطن عمي
وكل همي
تشيل غمي
تشيل الرابطة اللي معصوبه
على عنيه ومتغمي
مالا جل ما ينفرط دمعي
تجري في العروق دمي
تنتفض روحي
ينطق ع اللسان بوحي
وأداري اخبي في جروحي
وأنا محتاج يدوب لقمه
وهدمه تداري في عيوبي
وكام في جيوبي
مش عايز
وسكنه تقول أنا مستور
مانش ساقيه وبس تدور
وليه مستكتر فرافيتك
وليه حقي عليه بتجور
وأنا مأجور
بقول حاضر
وبتحاضر
أقول حاضر
وكل كلامي في محاضر
ومش قادر
على كلمة ا أقولها لك
وكيف ينطق لسان مربوط
وأخاف ينطق لتبلعني
غيلان الغابة ويا الحوت
انا بداره
ما بين جدران الحاره والشارع
وانا الباني على ارضي
وانا الزارع
وانا اللي يوم ما تندهلي
باشيل فاسي ومفتاحي
واكون صانع
كتير منا هجر داره
وساب ولده في دواره
ما لاجل يعيش عبيد غيره
وسوط نازل على جسمه
ومين يعرف في البلاد اسمه
يا دوب دمعه على خده
بتحفر فيه تمن غربه
وصرخة آه مدفونة
بيحلم بالرجوع تاني
ويضربلك دفوف وأغاني
وناي يعزف مواويلك
ويعطش
يجري ويجيلك
ويدفي بشمس حنينك
ويشرب من عيون نيلك
من ديوان " يوميات عامل ما بيفهمش "
ليست هناك تعليقات:
إرسال تعليق