 |
| الشاعر والكاتب محفوظ بريك ابن كفر يعقوب بكفر الزيات |
الكدب منهم بشوفه يزيد فى قلبى النار
والعيشه صبحت معاهم قرف
والقرب منهم عار
يارب عطفك بنا دا مات ضمير الناس
خلى الحقيقه انتهت والكل صار فشار
يافشارين الزمن بالسح دح امبوه
ياللى الشريف وسطكم بالفشر توهتوه
ومعاد يفرق مابين الفجل والباميه
ومدام ضميرنا صبح سارى عالعاميه
يبقى المخلل عنب والفاتحه للى باعوه
الحق ضاع وانتهى بين رجول الناس
ومدام عقولنا لبسناها وقلنا مداس
تبقى البطاطس عنب والقرع صار قلقاس
يافشارين البلد فى الجد تعملوا ايه
فشركم بحره وسع والجد تايه فيه
ونفوسكم مهما علت برضه ماتوصل ليه
يافشارين البلد امتى تتوبوا ياناس
الفشر منكم طهق
حتى الضمير احتاس
والكدب فيكم مرض شتت عقول الناس
فامتى تتوبوا بقي وتصلوا على الهادى
داربنا قال لكم فى كتابه
توبوا ياعبادى
ليست هناك تعليقات:
إرسال تعليق