الشاعر والأعلامى أ / أحمد محمد زايد
عضو إتحاد كتاب مصر و معد برامج بقناة مصر الزراعيه ورئيس نادى الأدب بكفرالزيات وأبن الدلجمون بكفرالزيات
كان عندنا مولد فى القريه
يحمل بصمة أهل زمان
كان يعمر بأوامر العمده
ومشورة كل الأعيان
فيه تلقى الأراجوز والسامر
والناس من كل البلدان
وخيام للإنشاد الدينى
فيها موائـــــــــد للغلبان
فته ولحمه وعيش بالدُّقَّه
والمراجيح فى الساحه كمان
فيها منها مراجيح بتزقزق
أو مراجيح صندوق وحصان
والقطر اللى يفرقع بمبه
وعليه يتزاحموا الشبان
علشان يستعرضوا عضلاتهم
والعضلات والقوه تبان
والدراويش فى صفوف الحضره
بطواقى أشكال والوان
وقهاوى بيجيلها الغاوى
والتايــــــــــه وما لُهْش مكان
يدخل لجل مايشرب قهوه
ولَّا سجايــــــر أو دخان
والحلوانى بتاع الحمص
واقف يرقص فى الدكان
والشرباتلى معاه السوبيا
وبيشرب منها العطشان
واللى معاه لعب الأطفال
لما يبيع تلقاه فرحان
والزوار فى ضريح الشيخ
والمسجد بالناس مليان
أقرأ أيضاً
ليست هناك تعليقات:
إرسال تعليق