صحبه جميله كما الأزهار فى خميله
لمه وياما فى فى عين الشمس ضليله
فى الضحوه كان جمعنا وأتفرقوا فى ليله
بين الصفا والجفا يا عينى غمضه عين
رحنا وراحت علينا وإللى كان يابنى
هديت كيانى وانا إللى عشت لك أبنى
عملت زى الزمن لما ابتليت سابنى
لدنيا أهل الوفا فى أرضها تايهين
وفى زحمه الهم غاب العقل يا خواتى
دور ياحادى النغم وانده يا ناياتى
ياصوت جريح فى الليالى يئن ويهاتى
صحا المواجع ورجع للطبابه حنين
ياللى معاكم قضيت معاكم الصبا كله
والقلب من بعدكم ياما اشتكى ذله
وانا لما جابنى الهوى تانى وقال قوله
الفل كان هنا والورد قال دا منين
أقول لهم أيه .. وشى بعد العتاب يعنى
وأنا بخاف م الهوى حفيفه يسمعنى
وجسمى طل الندى لو مسه يوجعنى
وحالى يصعب على الخالى وباكى العين
ياورد فكر فى عشره عمرى تلقانى
أنا إللى أخلصت لك عن أى بستانى
ياورد مش كل عاشق للزهور جانى
أنا بحبك وقلبى فى الهوى ياسمين
تعالى يابن الغرام لو فى الخلا ونعيش
جنه وهجرها الصفا مايطيبش فيها العيش
أبداً ويوم المنى من غير وصال مايجيش
دلوقت احنا هنا بكره ياعالم فين
تعالى ناخد من الدنيا الجميله يوم
تعالى قبل الندم ما يدبلك واللوم
تعالى نسهر لغايه لما اروح فى النوم
ويسألوك ع الحكايه قول حكايه مين
وادفن همومك معايا كلها وأمشى
قدر كان إللى كان فى الدنيا ما كانشى
قدامك العمر والحى ما يسلمشى
بكره الليالى تقولك ده سلف ودين
ياما نصحتك وكان لك حظ فى عندى
وانا قلت لك ياحبيبى كل ما عندى
حكايه عمر وإللى شوفته بالعين دى
ياما ويا ما حكاوى وإ للى يسمع مين
أقرأ أيضاً
قصائد للشاعر الراحل/ سيد مسعود
ليست هناك تعليقات:
إرسال تعليق