ياديب عوى ف السحر ففجع عيدان الحشيش خدنى من الصمت الشقى دخلنى قلب الوشيش نادى لشجر الشمس ف العتبات جالى كبنت بتغتسل م الوجع البحر يضحك ليها
والترعه تديها طياب التوت
وفراشه سكرانه ف حنين الشمس
بتنادى طفل يمام بيذكر ..
كوكو.. كوكو
وحدوا ربكوا
وروايح الحلوين فى كمى نبع فايح
منديل يعدى الأوليا ..
وسكن لبنت الروح
بديعة السر
أم العيون المسنودين ع الرغبه
المطلقين ع السما راكبين معارجهم
بيفضوا أختام الغياب من باب لباب
ومن سقف لسقف
وخدين معاهم أرضهم وخيولهم
أرواحهم المتلحوسه بالطين .. ف حين
ومباهج الطواسين فى حين
بيغنول للمجهول لكوا
كوكو .. كوكو
وحدوا..ربكوا
وفضوا ختم البكاره من على قلبكوا
لو كات ضلوعكوا ملككوا
ودوها نبع الريح
وعمدوها فى لجيج البحر
مرروها فى حوارى الهيش
تدخل حشيشة الروح
وتبوح بمكنونها لكوا
ياكلكوا
أنا عودى طفله بضفاير
عنقود عنب مخمور
وساقية ريح
تقرى كتاب المصاير
بتزف كل صباح عيالها للشقى .. تصلى
ع النبى .. بتصلى
ع الكد .. بتصلى
على كسرة الضِهر العجوز .. بتصلى
على كل أرجوز نبح صوته
وعدى ف الديار يقرى كتاب النار .. تصلى
الله ماصلى على حرف الكتاب الدور وصلى
يا كل من عطر عيون الحى صلى
صلى لشجر النخل ف العالى
ولوردتين فى خدود البنت تحلالى
فتكون حلالى وموالى
جسد فاير طرح رمان
وبطن بانت هوى طرحت عجين خمران
فأفضت الهوجه
لبحر بعت الحكايه الموجه عالموجه
: عدلنا موج البحر يا
دا الجى أكتر ماللى رايح
وروايح الحلوين فى دمى نبع فايح
منديل يعدى الأوليا
سكن لبنت الروح/ بديعة السر
بتغى للمجهول لكوا
كوكو .. ككوا .. وحدوا ربكوا
ليست هناك تعليقات:
إرسال تعليق