الشاعر رضا غريب ابن كفر الزيات
معرفش اذا كنت كبير
أو مرة كنت صغير
طول عمرى م بينكوا كبير
وعكازى ليه متنى مخوخ؟!
من امتى انا بينكوا كبير
من امتى انا كنت صغير
معرفش روحى أنا مين
مفهمش دا أمر يحير!!
اكتافى أهم شايفين
لاحمالى شايلين صابرين
والعود اخضر ومزهر
معناته أنا لسة صغير
طب ليه محنى ومرخرخ؟!
ضهرى وركابى تشخشخ!!
والعمر عداده مصفر...
معناته كبير ومكحكح!
وازاى عجوز بيغرد
على غصنه وديله محنى
مع طلعة فجره بيشقشق
بيلحن عشه ويغنى
و سؤالى عليكوا بكرر
يا اسيادى انا عقلى اتحير
معرفش اذا كنت كبير
أو مرة كنت صغير
لو كان عملى وياكوا
كان حلو سكر ومكرر
عاملونى على انى صغير
أو كان كرهى فى لغاكوا
كان هم علقم وممرر
سامحوني عجوز ومخنشر
كبير صغير كبير صغير
معرفش اذا كنت كبير
أو مرة كنت صغير.
وأقرأ أيضاً
ليست هناك تعليقات:
إرسال تعليق