دخلت روض الجمال أسأل عن الياسمين
الفل قال كان هنا والورد قال دا مين
وأتعجب الحسن والنرجس ولا فاكرين
يابلبل الروح تعالى فكر الناسيين
قل للهوى غنوتى واحكى عن الجنه
وزقزقه قمرتى فوق تمر الحنه
وحشنى صوتك وفين يارقصه البنه
ياحب ياليل ياعمرى إللى بتمنى
لو عاد الزمن تانى يطرح الياسمين
الورد ناس إللى عمره ضيعه أشواق
عشان ياعينى كبر واتحاوطوا بيه عشاق
وأنا إللى ربيت وما كان له فى العيدان أوراق
يازهره العتر انتى أول الشاهدين
مين أول إللى زرع فى الأرض ريحانه
بالجد والكد ولا كان حد ريحى أنا
أحبابى ريحتهم وتعبت روحى أنا
ولما ضهرى أنحنى مش عاجب الرياحين
حقيقه ان الزمن غير ملامحنا
وشيبتنا الليالى بعد ما لحنا
حتى إللى كان ودهم لو يفضلوا ريحنا
شافونى عن قرب قالوا ياترى دا مين
صعب عليا وقلت لهم سلامه الشوف
بقى إللى عشش لكم دى لوقت مش معروف
ياللى ما فيكم رجا ولا عندكم معروف
عودى يا مراكب كما كنا وكان البين
على أى مرسى ونرحل م البلد ديه
ضاقت علينا وفيها الصحبه مش هيه
ياللى بكانى زمن واليوم فرح فيه
لا انا أول إللى أتنسى ولا أخر الراحلين
خدينى ياغربه أبعد م النجوم ما تغيب
والجرح له صبر عندى وان ماكان حيطيب
أموت أنا بعلتى ولا اذلهاش لطبيب
عمر ابن يوم يا فؤادى لم يعيش اتنين
مشوار بعيد ع الوحيد والطريق واعر
صعب المسالك وليل حالك بلا ساتر
حطيت رحالى وانا ع الحمل مش قادر
غنيت لحالى تسالى بالحزين لحزين
وياعينى شوفى الليالى والزمن خلا
لا خل بيودنا ولا عاد لنا خله
حتى فروع الشجر مبقاش لها ضله
ياصبر خليك معانا رد للصابرين
ياصاحبى لازمتنى زى الجسد والروح
ياحلو يامر يامداوى علل وجروح
خايف تسيبنى وانا ياصبر فيا الروح
يفضحنى دمعى وسرى تعرفه العازلين
ويا ليل حكايتك معايا طولت ياليل
هوا الضنا كام سنه والسنه كام ليل
كام دمعه من شمعه قادت وانطفت ياليل
لم حد جانى واسانى وقال دا فين
ياشده عدى وخفى الحمل عن راسى
وانسانى يافكر ليله واسهر مع الناسى
ياراحا البال وحشنى فرشى ونعاسى
والضحكه م القلب والقعده مع الحلوين
كنا سوا ياهوى دنيا لوحدينا
ومحلقين فى الهوا ويا امانينا
لا بنحسبوا للزمن ولايحسبوا لينا
لا حب كان قبلنا ولا زينا عاشقين
أقرأ أيضاً
قصائد للشاعر الراحل/ سيد مسعود
ليست هناك تعليقات:
إرسال تعليق