الشاعر/ عماد البدرى ابن الدلجمون بكفرالزيات
أنا مش ضعيف
وماليش دوا
أنا بس
صعبان ع الهوا
سلمت لك
روح السنابل دنيتي
بين شهد حضنك
وأمنت لك
يا تزيدي ناري ف جنتي
وتصوني روحي ف عز همك
أنا كنت مين ؟!
أنا كنت فين ؟!
أنا كنت راوي لبذرتك
مع بذرتي
أنا كنت عاشق دنيتك
مع دنيتي
أنا كنت راسم خطوتك
مع خطوتي
والغلطه كانت غلطتك
مش غلطتي
أنا كنت زي الطيف خفييييف
أنا مش ضعيف
مين اللي قال ان الهوا
بين الفروع تاه في الربيع
مين اللي بالنار انكوا
بين الضلوع حامي الشموع
خايف تضيع
مين اللي كان ناوي الفراق والإشتياق
نبضُه السريع
مين اللي كان ناوي الضياع
مين فينا خاين واللي باع
صوت الهوا ف عز الخريييف ؟
قولي لقلبك إن انا
أنا مش ضعيف وماليش دوا
في البُعد عنك
أنا بس صعبان ع الهوا
إن جرحي يبقى منك
أنا تُهت فيييين ؟
أنا كنت مين ؟
أنا عشت عمري ودنيتي
كما طيف خفيف
أنا كنت جاهل سكتي
مقتول بزيف
أنا كنت نارك شمعتي
أنا كنت ضيييف
أنا مش ضعيف
أنا مش
ضعيف
وأقرأ أيضاً
ليست هناك تعليقات:
إرسال تعليق