الشاعر أحمد محمد زايد
عضو إتحاد كتاب مصر و معد برامج بقناة مصر الزراعيه وأبن الدلجمون بكفرالزيات
مستحيل مابين دروسك مره تانيه اديك صباعى
ولامره تانى افكر انى اعيش ويا الافاعى
انما قلمى وورقى راح يكونوا خطوط دفاعى
من دلوقت عشان بلدنا ح ابقى مصلح اجتماعى
بعد ما اتعديت حدودك وابتديت تعمل خدع
وابتديت ويا زملاتك تبقوا سوس فى المجتمع
تنخروا ف عضم الغلابه تملوا قلب الناس وجع
فينا تاكل مهما تاكل مش ح توصل للشبع
طاب ح نعمل ايه قولولى فى اللى مهوس بالطمع
مهما انى مهما ح اكتب ح التقيكم فى الطناش
بصوا للعام الدراسى اللى لسه ما ابتداش
وابتديتوا العام بتاعكوا لجل منا تاخدوا كاش
والغلابه يقولوا ولادنا لو ماراحوش ح يروحوا بلاش
ولافكرتوا فى حد فقير ولا طالع ع المعاش
واللى منا باع عيالوا والعيال ماجابوش فلوس
واللى منا باع عزالو فى المزاد لجل الدروس
وانتوا مشرطكم بيقطع فى الرقابى وفى الرؤس
ولا فكرتوا ف اى حاجه غير فى اذلال النفوس
واللى واقعين تحت ايدكم ياكلوا عيش من غير غموس
لما احلام التفوق فى العلوم صبحت كابوس
واللى بيحصل من حضراتكم مالهوش مطرح فى القاموس
انما يشبه ياساده فى الحروب حرب الباسوس
حربكم ع الدوله معلن ليل نهار مالهوش نظير
فيها جندتوا المواطن فى الوطن ضد الوزير
المكلف م الرياسه انه يبدا فى التطوير
يبتديه بنهج علمى اعتماده على التفكير
م التلقين ينقل عيالنا للابداع والابتكارات
له اثار ايجابيه تظهر ع البحوث وعلى الدراسات
زى غيرنا من الدول اللى قطعت فيه مسافات
اللى عملت تكنولوجيا فى الزراعه وفى الصناعات
وانتوا علشان مصلحتكم واقفين ضد الانجازات
مش هاممكم من دا كله الا لهف القرشينات
واختصرتوا العلم كله فى الشهاده وفى الدرجات
والشهايد كوم مكاوم ع الرصيف والبترينات
يااهل بلدى خلوا بالكم م الكلام والارشادات
واما يعيدوا معاكوا اللعبه غنوا وقولوا التعلب فات
الا طول ماوراهم تمشوا مش راح نخلص م الحكايات
اصل التعلب لما بيلعب مايهموش الا الدولارات
ولا بيهمه وطن ولادوله واللى اتاخد من قرارات
ولا بيهمه قانون ومحاكم ولا م العرض على النيابات
ليست هناك تعليقات:
إرسال تعليق