الشاعره ناديه زكى
أستاذه الخط العربى بالأزهر وحصلت على العديد من الجوائز وشهادات التقدير من بيوت ثقافه متعدده وصدر لها ديوان دعوه للحب فى 2019 وأبنه كفرالزيات
سامعه صوتك فين مااكون
يامّه قلبك كان حنون
كنتِ فى ضى العيون
مشتاقالك وبجنون
كل حاجه حلوه مُرّه
والأحزان طليقة حره
نفسى اشوفك بس مرَّه
وألقى صورتك في العيون
مشتاقالك وبجنون
قولى بعدك مين حيدعى
مين حيمسح ليّا دمعى
كنتِ يامه ضله صافيه
حضن وافى وشمس دافيه
عارفه طبعى بدون ظنون
مشتاقالك وبجنون
كل مطرح بيناديكى
كله حاجه روحها فيكى
يام سبحه كات تسبّح
شلتها ذكرى ايديكى
كل مافتكرك ياأمى
ألقى إيدك مادة عون
مشتاقالك وبجنون
كل حاجه في بيتنا حزنت
كل حاجه سليمه خربت
ياللى كنتِ سفينه لينا
وصلتنا للأمان
والسفينه أديها غرقت
يامّه عينى من بكاها
عينى دبلت والجفون
مشتاقالك وبجنون
كانت آخر خدمه ليكى
إنى غسلتك بايدى
الف رحمه ونور عليكى
انتِ ذكرى جوه منى
يام قلب وكان حنون
ليه ياأمى بعد هجرك
إن بيتنا صار سجون
مشتاقالك وبجنون
ليست هناك تعليقات:
إرسال تعليق