الشاعره ناديه زكى
أستاذه الخط العربى بالأزهر وحصلت على العديد من الجوائز وشهادات التقدير من بيوت ثقافه متعدده وصدر لها ديوان دعوه للحب فى 2019 وأبنه كفرالزيات
اصبر شويه
خليك معايا اللحظه ديه
لما الم جروحى بايدى
لما تخرج من وريدى
لما اصوم واستنى عيدى
لما انسى انى الضحيه
كفاية قاطع أوتار مابينا
واحنا حتى ماتقابلنا
جى ليه وقافل بيبانا
ظلمت قلبى وجنيت علي
اصبر شويه
كت فاكره روحى فى جنه
دا النار فى كفى شايفها حنه
لا البعد فرض ولا حتى سُنّه
فارقتنى روحى وانا لسه حيه
اصبر شويه
من غير جناح خلتنى طايره
فراشه سارحه فى الدنيا حايره
خنقت روحى فى جوه دايره
وبتملا كاسك من عنيا
اصبر شويه
اصبر أما يبان نهارى
ساعتها آخد فيك قرارى
وتبقى جنبى وآخد بتارى
بأمر قلبى اللى جاى عليا
اصبر شويه
ليست هناك تعليقات:
إرسال تعليق