الشاعر رضا غريب ابن كفر الزيات
حياتنا فاترينة عرض
والفرجة ع المكشوف
وبضاعة سليمة وكسر
واحنا فيها ضيوف
وكتيب دليل يبين
ومعاه كمان كتالوج
بلغاه أكيد ح تقيم
الصالح م المعطوب
خد لفة معايا وحلل
وبعينك بص وشوف
فى وشوش ف الفجر تنور
ووشوش كاسيها رتوش
و هناك درويش ومهلهل
والسبحة فايقة الطول
على وشه النور بيهلل
وكلامه حِكَمْ وأصول
واخينا بيه ومنشى
وسماحته مالية وشه
دا ضميره قبل كرشه
م السحت بالون منفوخ
وغزال ماشى يتمخطر
ووراه خنزير حلوف
بيعاكسه ولا بيعبر
الحرمة ولا مكسوف
راح قابله سبع غضنفر
سواه ب يدود وكفوف
وبلاوى كمان تتنطع
ع الناصية فوق كل رصيف
وأمطار وطين بيلطخ
والصيف صداع يا لطيف
والضغط عالى ومزنهر
والسكر فوقيه بيضيف
وسارينة إسعاف بتصفر
وزحام ومصاب بيموت
وسواق كارو متعفر
حالف ما حد يفوت
وحصانه بيفهم عنه
نطاح ولا كبش خروف
وخيار وكلور ومعصفر
يتباع بمكبر صوت
ودى هيصة ستات بتزغرد
وخناقة بفقع الصوت
وعروسة فايتة ف الحنة
وملبس ولا حدف الطوب
وجنازة تدعى ب الجنة
لفقيدها اللى مات مخطوف
وآذان ع المدنة يكبر
وصلاة بامام وصفوف
وطاخ طيخ طوخ
م الإبرة للصاروخ
حياتنا ع المكشوف
حياتنا ع المكشوف
ليست هناك تعليقات:
إرسال تعليق