كان زمان دنيتنا صعبه
فيها م الأعباء كتير
والكبير فيها والصوغير
كان يحمل ع الفقير
كنا بنشيل فوق كتافنا
حمل أتقل م الحمير
والبلد م المغربيه
كان ينيمها الغفير
والغنى ياكل عيالنا
واحنا يرمولنا الشعير
كان يخش الليل علينا حس لا،
ولا أى همسه
كنا نغرق فى الظلام
أو فى لمبه نمره خمسه
كنا تحت الشمس نفضل
شغالين طول النهار
كان منانا وضى عينَّا
رطل قته أو خيار
كنا نفرح ليلنا يطرح
لما حد يجيب غيار
ولَّا رطل ونص دهنه
ولَّا عضم من الجزار
لو فرح أو فيه مناسبه
ولَّا حفله من الحفلات
ولَّا دعوه من مرشح
جاى عشان الانتخابات
الفقير يدوه صابونه
والغنى يدوه شربات
ولا يتوزع فيها كاكولا
ولا يتوزع فيها جاتوهات
يدوك تفته بميه وسكر
داخل كوز من غير شفاط
كان فى المركز تلاتين قريه
يتعالجوا ف مستشفى وحيده
والنساوين كلها فى القريه
بتولِّدهم خالتى حميده
والمزين يعمل دوكتر
والسياره حماره بليده
كان العمده الآمر الناهى
وأداة التعذيب وياه
وما حيلتوش غير يدى أوامر
وماحدش يقدر يعصاه
واللى يفكر، يكسر أنفه
وبيديه على أم قفاه
كنا نجيب أولاد للسخره
عند الباشا وعند البيه
كان بيخش العيد
ولا نعرف يوم العيد راح نلبس إيه
واما يمشى الباشا يدوسنا
ونقوم نهتف من حواليه
ويفقعنا ويفرقعنا
زى الدود من دوس رجليه
وانا علشانكم لسه ح اكمل
بس بشرط تقولوا أوكيه
أقرأ أيضاً
ليست هناك تعليقات:
إرسال تعليق