الشاعره ناديه زكى
أستاذه الخط العربى بالأزهر وحصلت على العديد من الجوائز وشهادات التقدير من بيوت ثقافه متعدده وصدر لها ديوان دعوه للحب فى 2019
لما شفتك من بعيد
فى انتظار لحظة لقايا
شفت قلبك فيك سعيد
حلمه كان لحظه معايا
كنت حاسه اني طفله
نايمه وحضناها الهدايا
إحساسى كله كان جديد
كطفل يحبى فى البدايه
تهمس برعشه شفايفى
ازاى هقابل منايا
كل نبضه ف قلبى زادت
وارجع اسْكت واقول كفاية
فجأتنى لهفة مشاعرى
وألف تسريحة لشعرى
ووقفت أبص ف مرايا
لابسه فستانى الجديد
عامله قلبى من حديد
رافضة أتلفت ورايا
كت خايفه يلمحونى
أيوه خايفه ليشوفونى
ويعرفوا عنا الحكايه
فجأة لقيتك قصادى
هيمان وطالب ودادى
وانت عارف فيك دوايا
من سُكتنا سمعت صوت
خفت خالص ٠٠خفت موت
دمعى دا ولا غنايا
دى الساعات وياك بتجرى
عمرى راجع بيا بدرى
مع إنه ساند عالعصايه
صحصحت في المشاعر
واتلككت مانا قلبى شاعر
وابتدا نَص الروايه
شفت الأرض بعينى جنة
ماحدش شافها كده غيرنا
والبعد عنها جنايه
صوتى صرخ من سكاتى
بالأنين وكمان آهاتى
ازاى اعيش من غير هوايا
والحنين هالل فى عينك
شوق يزيد بينى وبينك
حبنا مالهوش نهايه
حبنا مالهوش نهايه
ليست هناك تعليقات:
إرسال تعليق