الشاعر/ عماد البدرى ابن الدلجمون بكفرالزيات
يا مدور
جوه ملامح شوفك
شوف !
يمكن تلقا ملامح تانيه
تقتل من جواك الخوف
يا مبعتر
دمى السايل من شرياني
راجع تاني هتلقا حروف
جمعهم واقراهم تاني
يمكن تعرف مره تشوف
جوه عيونك شوفت ملامح
روح غرقانه ف بحر كهوف
شمس ونجمه وسمكه ف شبكه
عالم تاني مش معروف
جوه النني لمحت عيوني
حست جوه عيونك خوف
احساسي وقلبك ظلموني
وإنت مبعتر أغلا حروف
فا أنا هقتل ظنك بظنوني
فا اسمع مني كلام مكشوف
يا. مدوره
جوه ملامح شوفِك
شوفي .!!
عشان خاطري بلاش تبكي
عشان الدمع مش هيفيد
خلاص احساسي انا مطفي
نار ورمادها مش هيزيد
فاهرسم صوره من تاني
وهرسم ضحكه للتنهيد
ماانا تايه في عنواني
مافيش في الدنيا أي جديد
لا عاد نهدك بيسقيني
ولا نبضك في قلبي وريد
ولا حضنك يدفيني
ولا حسه بإني بعيد
ياسارقه كل تكويني
يا قاتله الفرح وقت العيد
يا جارحه كل شراييني
وأنا بالجرح قلبي سعيد
أنا صابر عشان ديني
أموت ف عنيكي وابقى شهيد
أنا صابر عشان ديني
أموت ف عنيكي وابقى
شهيد....
ليست هناك تعليقات:
إرسال تعليق