مطلوب إعتصام ماركه ( وغُلِقت الأبواب ) ومطلبنا عايزين شغل يا إداره

 بعد شويه نقاشات بينى وبين الزملاء فى صفحات أبناء ورجال شركه كفر الزيات للمبيدات والكيماويات بالفيس بوك وجدت إن الكل مشغول ومهموم بكزدنا اليوم وفى المستقبل ووجدت إن الكل واعى وعارف مواطن الخلل فين وعلاجه كمان
وتوصلت إلى أن شباب المهندسين والمديرين ليس عليهم ملامه وكل العمال فى كل القطاعات دماغهم صاحى وعايزين يشتغلوا عشان  كزدنا تكبر وأسمها يلعلع فى السما
وكلنا طبعاً حاسين وعارفين ان كزدنا بعافيه شويه اليومين دول زى مصر بالظبط
وإن كل أحلامنا الجميله لكزدنا محتاجه لقرار سيادى وهذا القرارالسيادى نحصل عليه أزاى
يبقى عايزين إعتصام ماركه  (وغُلِقت الأبواب) ونرفع الشعارات الأتيه ونعملها لافتات   بمطالبنا الرئيسيه وتكون هيا شعاراتنا ولافتاتنا وهتافاتنا 

(أشتغلى كمان يا إداره)(شدى حيلك يا إداره)(حِسنا إتنبح يا إداره)

(عايزين نروح تعبانين من الشغل يا إداره)

(الترويج عايز يروج) ( الأنتاج عايز ينتج )(المبيعات عايزه تبيع)

(يعنى إحنا غلطانين كده يا إداره)

وكده يعنى 

ونقدم طلباتنا الأتيه
1- دعم وتنشيط إداره الترويج يعنى تبقى إداره ترويج بجد ويسند إليها دراسه الأفكار الجديده وتطويرها


2- تنشيط جهاز البيع ودعمه بخمسين مهندس زراعي مبدئياً ويتعمل لهم حافز بيع جيد ومحدش يبصلهم فيه
3- إنشاء مجلس للحرب من جميع مديرينا العموم تحت السبعين فقط علشان يكونوا بيعرفوا يحلموا لبُكره وبعده ومهمته بحث كيفيه  إحتلال جميع أرفف محلات المبيدات الزراعيه بمنتجاتنا الزراعيه وإحتلال أرفف وفتارين الصيدليات ومحلات البقاله والسوبر ماركت  بمنتجاتنا المنزليه فى جميع أنحاء الجمهوريه ووضع الأفكاروالخطط والاستراتيجيات الازمه للنجاح فى هذه الحرب وتوزيع الأدوارعلى جميع عناصر كزد كى نكسب هذه الحرب ويظل هذا المجلس منعقداً حتى بعد البدء فى التنفيذ للمتابعه  وإعتبار إحتلالنا لهذه الأرفف المذكوره هدف استراتيجى يعنى حياه أو موت لينا ولكزدنا
4- تنشيط جميع المسؤلين عن تسجيل المواد والمسؤلين عن البحث عن مواد جديده أزاى منعرفش
5- تنشيط رئيس قطاع البحوث حتى يكون لدينا قطاع بحوث بجد ويكون له خطط بحثيه ومنتجات بحثيه بأسم كزد . ازاى منعرفش .. . مش شغلنا المهم ينشط وخلاص 
6- رفع سقف أحلامنا فى رقم مبيعات يتعدى نصف المليار جنيه فى خلال عامين .. وليه لأ !! مش مستحيل
لأنه لما بيكبر حلمنا بيكبر جهدنا ويتحقق أملنا كلنا 
7- العمل بكل الطرق على أن تعمل كزد كأسره واحده . حد يكره !!

ومستعد لإضافه أى مطالب جديده يراها الزملاء لتحقيق هدف الاعتصام وهو عايزين شغل ياإداره

ولتسلمى ياكزد

وتعودى فى عيونى شابه قويه وعفيه وخطوتك لما تنزل على الأرض تدب

مش عايز أشوفك عجوزه كركوبه مكرمشه محنيه رجلها والقبر


وربنا يشفينى !!

////////////////////////////////////////

من منتجات كزد

صنعت بأيدى مجموعه مختاره من القتله المحترفين 

تخصصهم القتل .. بالأجر طبعاً

قتل الحشرات المنزليه والأفات الزراعيه فقط لاغير

لكن للأسف لن تجدوها بكل مكان لأن جهاز البيع بتاعنا وعملائنا 

 بعافيه شويه

 نسألكم الدعاء لهم بالشفاء